iPhone prej 2.5 milionë e gjysmë dollarësh Një iPhone krejtësisht i zakonshëm i dekoruar me një sasi të caktuar të arit dhe gurëve të çmuar është bërë një prej telefonave më të shtrenjtë në botë. Argjendari australian Peter Aloisson është i njohur për dekorimin e telefonave celularë dhe pajisjeve tjera elektronike me zbukurime të shtrenjta. Vepra e tij e fundit është iPhone e emëruar King's Button. Bëhet fjalë për dekorimin më të shtrenjtë të Aloissonit deri më tani. Telefoni celular i kompanisë Apple është dekoruar me ari ngjyrë të verdhë, të bardhë dhe rozë prej 18 karatësh dhe me 138 brilante. Tasti kryesor i iPhone është dekoruar me diamant 6.6 karatësh. Shpenzimi i përgjithshëm i këtij dekorimi është 2.517.345 dollarë amerikanë. Nuk e dimë nëse në këtë çmim është përfshirë edhe ai i vet telefonit, por është e qartë se ajo nuk ka edhe aq vlerë në tërë këtë shumë.

Laptopë nga Nokia? Në një intervistë të cilën njeriu i parë i kompanisë Nokia, Olli-Pekka Kallasvuo, i ka dhënë televizionit kombëtar finlandez YLE është thënë se Nokia është duke marrë parasysh hyrjen në tregun e laptopëve. Në Nokia theksojnë se qysh tani po shembet kufiri në mes pajisjeve të cilat fillimisht i vlerësojmë telefona dhe laptopëve, prandaj në kompani shumë aktivisht janë duke vlerësuar mundësinë e prodhimit të laptopëve “të vërtetë”. Thashethemet për hyrjen e mundshme të Nokias në tregun e laptopëve janë të pranishme që prej fundit të vitit të kaluar, mirëpo ky është konfirmimi i parë i aktiviteteve të tilla. Sipas vlerësimeve të analistëve të pavarur hyrja e Nokias në tregun e laptopëve është një veprim logjik duke marrë parasysh se të gjithë operatorët kryesorë të telefonisë mobile në ofertë kanë edhe laptopë të pajisur me kartela për të dhëna.