Policia spanjolle ka arrestuar 2 futbollistë profesionistë dhe dy agjentë futbolli në një operacion ku sekuestroi edhe 600 kg kokainë e ngarkuar në anije nga Argjentina.
Policia, e cila vuri nën pranga edhe 7 persona të tjerë, nuk identifikoi asnjë prej të ndaluarve. Por B 92, raportonte se dy nga të arrestuarit ishin ish futbollisti i Crvena Zvezdës, Predrag Stankoviq, dhe menaxheri Zoran Matijeviç. Po kjo media, njoftoi se lënda narkotike, ishte vendosur në disa makina bujqësore të imbarkuara në anije. Vlera në treg e kokainës, mendohet të arrijë në 70 milion Euro. Në një konferencë për shtyp, shefi i njësisë kundër krimit të organizuar dhe lëndëve narkotike, në Madrid, José Luis Conde tha se ngarkesa u gjet në bazë të informacioneve nda një shpërndarës droge në mbikëqyrje.
"Ne filluam hetimet përmes dikujt që kishte dosje kriminale lidhur me trafikun e lëndëve narkotike. Ne e dinim se ky njeri po përpiqej të gjente financues për të blerë drogë dhe ti sillte ata në vend. Një nga personat i cili do të merrte një pjesë të mallit, u ndalua,…por ne ende nuk e dimë se kush ishte destinacioni final i drogës. Kjo do të jetë prioriteti ynë", njoftoi shefi i njësisë antikrim, José Luis Conde.
Droga mbërriti në Spanjë në një kontenier që ngarkonte pajisje ngarkimi. Argjentina është bërë një rrugë tranziti e njohur për kokainën e prodhuar në Colombi, Bolivi ose Peru, ndërsa Spanja për një kohë të gjatë, ka qenë e preferueshme edhe nga trafikantët amerikano jugor, si një pikë hyrëse për në Evropë.
